بحث هذه المدونة الإلكترونية

2013/02/24

مخبر صحياسي

حُمير: دخلك شو تحليلك  للإحداث الراهنة بهاللحظة التاريخية اللي عم يمر فيها العالم العربي ، ولوين رح تاخدنا هالإنعطافة التاريخية
جُحَيش : أنا شايف متلها متل غيرها غيمة وبتمر
- بس المرّة غير ، ممكن تكون هالغيمة ماطرة
- من أيمتى ما كان في احتمال أنّو تكون الغيمة ماطرة
- لا لآ ... المرّة غير  ، شو كإنك مو قريان اللحظة التاريخية صح يا صديقي نحنا اليوم أمام انعطافة تاريخية هامة .. المرّة أكيد غير
- أنا ما بدي اقرا ولا بدي حلّل ... ولا حرّم كمان ، لأني من يوم خلقت ونحنا بنمرّ بانعطافات ولحظات تاريخية ، صار معي تخمة بالإنعطافات التاريخية يا أخي
- بس ضوروي نحلل الوضع صح ، لنعرف  على أي حيط بنسند  ضهرنا
- لا تخاف نحنا معشر الحمير كتير ضهرنا بيشيل ومنتحمّل كتير 
- ما اختلفنا بس لازم نعرف شو اللي عمبيصير 
- بسيطة  بدك تحلل رحلك على شي مخبر بيطري
- شو بيطري  ما بيطري
- لوين يعني بيروح الحمار اللي بدو يحلل
- بدّي تحليل سياسي أعرف شو عمبيصير
- دخلك... ليش المخبر الطبي شو بيحلل ؟
- ببحلّل دم ،
- بيحلل بول ؟ 
- أي بيحلّل بول.
- بيحلل خرا ؟
- أي بيحلل
- إذاً بيحلل سياسة
- كيف كيف؟؟؟؟
- مو عم بتشوف معظم المحللين اليوم عالفضائيات بس يحللو عم تطلع روائح زنخة مع التحاليل , يعني متلون متل تحليل المخبر اللي بيحلل بول وبراز ، والمشكل ما عم نعرف هون الريحة هاي من المحلل أم من المواد اللي عم يحللها

2013/02/18

ربيع الحمير




حُمَير : شوف يا أخي الوضع ما عاد ينطاق ، بيبيعو شعبو لأمريكا ، لإسرائيل  . يصطفلو شعبو وحرين فيه ، بطيخ يكسّر بعضو
جُحَيش : إذا مفكرين أنّو نحنا الحمير رح نسكت  بيكونوا غلطانين
حمير : وإذا مفتكرين يورطونا بالتسليح كمان بيكونوا غلطانين
جحيش: وإذا مفتكرين أنو  ما رح توقف معنا  كل حمير الأمة كمان بيكونوا كتير غلطانين
- : وإذا مفتكرين أنو نحنا الحمير ما رح نحقق وحدة أمة الحمير من الماء للماء أيضاً بيكون مو مقدرين الحمير حق قدرها
- :أصلاً ما عنّا شي يفرقنا متل البني آدميين
- : نحنا هون ولدنا وهون ربينا ، وتعودنا على حشيش الوطن
- : وحشيش الوطن تعود علينا
- :أغبى من البشر مافي ، بدّون يبيعونا لدول معادية
-: قال شو بدون يعملو تجارب طبية لتحصيل أدوية بشرية سرطانية من جلد الحمير
-: قلتلك أغبي من البني آدميين مافي ، إذا جبرونا نترك البلد وباعونا لأعداء بلدنا ، رح يسلخو جلدنا للتجارب وبيرجعو ببيعونا لبلدنا الأصلي على أساس لحم غنم ، وهيك بيكونو اشترونا حمير  وباعونا  بقر
-: متل ما بتعرف بيكون ارتفع سعر الحمير وصار بسعر البقر ويمكن أكتر 
- : أيامنا يا أخي  ، حدا بيقللك مو ربيع الحمير

2013/02/16

لوين ؟؟؟؟؟؟ رايحين






جُحيش :  يا صديقي حمير , برأيك لوين رايحين بهالمعمعة وهالعرعرة
حُمير   :  يعني لوين بدنا نكون رايحين يا إلى جنان الخلود أو فجهنّم وبؤس المصير   
جحيش : فعلاً  حمار . حمار ومعتّق كمان وشبعان حمرنة ، يعني في شي حمار ما بيعرف أنّو لا توجد منطقة وسطى ما بين الجنة والنار
حمير   : إذاً ليش حضرتك عمتسأل إذا بتعرف أنّو كل جحش بيعرف أنّو لا توجد منطقة وسطى ما بين الجنة والنار
جحيش : الحق  عليّي ... بعرف إنّي عم أحكي مع حمار  ولازم وضّح السؤال
حمير   : إي ها هيك الحكي وضّحلي السؤال
 جحيش : المقصود لوين رايحين بهالمعمعة والعرعرة هل سنصل إلى دولة علمانية أم دينية ؟؟
حمير    :أي ها هيك بيسألو الحمير الفهمانين اسمع يا أخا الحمرنة
            أظنّنا حتماً إلى دولة دينية واضحة تماما ولا ريب في ذلك فالجميع مع الله والله مع الجميع




جحيش : ومن أين لك بهذا التحتيم واليقين
حمير   : واضحة تماماً مو شايف حضرتك أنّو الله  وسوريا هما  القاسم المشترك الأكبر بين الموالاة والمعارضة
 الله سوريا بشار وبس               
الله سوريا حرية وبس

جحيش : مع احترامي لرأيك وهاي كلمة ( بس )اللي قد  دنبك وين راحت شو ما شايفها واللّا ما بدك تشوفها لا هيّي ولا الطرف التالت اللي                 
           لا مع أول بس ولا مع تاني بس 
حمير : الطرف التالت هنّي مع الطرفين وضد الطرفين  وقاعدين ينتظروا فرج الله ورحمتو وبالتالي الله قاسم مشترك للكل
جحيش : بفهم من كلامك أنّو لا يمكن نكون رايحين على دولة علمانية
حمير  : علمانية ؟؟؟؟ شو كأنّك ما سمعت بالمثل اللي بيقول انّو الحمار بيضرب بالحيط  مرّة أو بيوقع بالجورة مرّة
جحيش : وشو جاب المثل للموضوع
حمير   : بدّك تخليني صير سلفي وأرجع معك لورا وفسّرلك ليش فشلو أسلافنا بقيام  دولة الوحدة والحرية والإشتراكية
جحيش : وليش فشلو بقيام الوحدة والحرية والإشتراكية
حمير  : بسلامة فهمك , الوحدة بدها شعب وحدوي مو كل واحد على حالو لأنو واحد زائد واحد بعلم الإجتماع العربي يساوي واحد لا يساوي اتنين , والإشتراكية مو أنّو البعض يشارك الكل بكل ماعندون ، والحرية مو أنّو هذا البعض حر بجمع  الأموال بكل الطرق غير الشرعية , والعلمانية بدها ناس علمانيين ومن وين بدك تعمل دولة علمانية بدك كتير لتعمل شعب علماني ما إلك  غير الصلاة والطلب من الله أنّو يتحول هالشعب لشعب علماني بأمر إلهي وغير بأمر إلهي لايمكن نوصل للعلمانية

2013/02/15

شهداء الحب في عيد الحب في بلد الحب

شهداء الحب في عيد الحب في بلد الحب



 - من محردة ...
 تتغير فوراً  أحاسيس محدثك عندما يسمع جوابك لسؤاله المعتاد عندما بلتقي إثنان ببعضهما للمرة الأولى ، وغالباً ما تتلاحق أسئلة محدثك بتواتر سريع يريد معرفة المزيد عن لغز صعب يسمّى محردة ، وغالبا ما يكون السؤال الثاني
- كم عددكم ؟؟؟؟
- أقل من عشرين ألف  ,,,, 
 ( تعيرنا أنّا قليل عديدنا        فقلت لها إن الكرام قليل  )
تتغير ملامح محدثك غير مصدق أن هذه البلدة ، بل الضيعة ، التي تملأ الدنيا ،وتشغل الناس  لا يتعدى عدد سكانها العشرين ألفاً 
- بماذا تشتغلون  ، وكيف تعيشون  ؟؟؟؟
 في سوريا  من لم  يسمع بمحردة فليس من سوريا ، فمحردة ليست من أنجب غبطة البطريارك أغناطيوس الرابع هزيم رحمه الله  فحسب، وليست من أنجب غادة شعاع فحسب ، فكل أبنائها متميزين 
لن أطيل ،،، 
أين تقع بلدتك في سوريا إحكي لنا عنها ؟؟؟؟؟  كان السؤال الذي يتلوه علي الكثير عندما سافرت إلى الخليج ، وبالأخص ممن يعملون معي في من العرب والسعوديين 
أنظر إليهم أهز برأسي وأقول
- إيييه ، ماذا أقول لكم  ، أختصر الحديث ، أخاف أن يضحكوا إن كلمتهم عن متعة  الأشواك على أطراف ملعب الكرة وهي تنغرس في رجليك الحافيتين ، كيف أستطيع أن أختصر بلدتي بكلمات ... أصمت وتسقط منّي ابتسامة مع ذكريات جميلة 
في أحد الأيام  أخطأ أحد الزبائن حين ظن أنني من لبنان ، وبدأ بالثناء على لبنان واللبنانيين وحال بلادهم وذوقهم الرفيع وأنا أراقبه وجميع من في مكان العمل ينتظرون نهاية حديث  الخليجي الثري ، ليسمعو جوابي عليه . ولما انتهى قلت
- صحيح أنا من بلد هي الأجمل والأروع وسكانها من أفضل الناس علما وحسناً وذوقاً وأدبا ، ولكنني ليست لبنانياً  ، من ضيعة صعيرة في سوريا أظن بأنك لم تسمع بها من قبل يا سيدي 
نظر الرجل في عيني وكأنه يقرأ  عنواني في عينيّ وقال لي 
- لقد عرفتك من  لغتك  ألست من محردة 
وحين نطق الإسم وقف زملائي في العمل مدهوشين لذكره الإسم
  وحين غصصت وانحبست  في عيني الدموع ؛ تابع محدثي السعودي حديثه : أي بالله نيالك يا أخي على هالبلد ، شو هالبلد وشو هالناس ، يا ريت كان في متل محردة وأهل محردة  ، أنا بسافر إلى سوريا لروح لمحردة 
- أوف أوف أوف . قال أحد الموجودين فأجابه المتحدث 
- صدّق أن هذه البلد لو زرتها مرة لما نسيتها في حياتك . ونادى  ولده الصغير 
- أحمد .. تعال يا أحمد .. متى تبي ( تبغي ) تروح محردة 
 قفز الولد الصغير في الهواء فرحاً
- الحين الحين الحين 
وعلمت أن أخوال الصغير من حماة
ولأن محردة كذلك فهي مستهدفة من قبل من استهدفوا  أبا العلاء المعري ، فهم يحبون الظلام ويزعجهم النور
حزين أنا على زهور محردة التي قطفت قبل أوانها في يوم من أيام الحب ، آملاً أن تعود كل أيام سورياً حباً كأيام محردة
شهداء محردة في يوم الحب ، هم شهداء الحب
لأهالي الشهداء وأهالي محردة الصبر والسلوان ، والموت حقداً لناشري الحقد والقتل

2013/01/28




على كندا المحبوب ودّيني


عم ينتشر اليوم على صفحات التقاطع الإجتماعي خبر بيقول : اللي بيحب يهاجر ع كندا من السوريين والسوريين حصرا المتواجدين في الخارج (بلا معنى ) وبالأخص الناس اللي كان وجودون بالخارج  بمعنى أفضل من وجودون بالخارج البلامعنى
وفي أرقام هواتف للإتصال ، ومو المهم لوين نروح ، المهم نروح المشوار
بذكر بأواخر التمانينات طلعت هيك قصة ، وبينما كنت مقتبلاً (ماشيا باتجاه الجنوب ) مع  جاري سعيد بعد أن تمكّنت فينا المتة وبالقرب من دكان السوق القديم ماسمعنالم غير هالأصوات وهالضجيج وكأنه يوم الحشر ، فسألني صديقي
- سامع متل أنا مو سامع 
- طبعاً 
- كأنّو في إن بالموضوع 
- لافي إن ولا أخواتها ولا كأن وبنات عمها
- شو في 
- المرحوم أبو ابراهيم ( الغاوي ) جايب فرقة الطبالي تتدرب منشان الباعود
- لسّا تلات شهور عالباعود يا زلمة 
-يمكن المرحوم ( الغاوي ) بعد الإنتقال ع الآخرة صار عزمو أقل من أول بدو يبلش بكير بالتدريب منشان يلحق عالعيد
وهيك وهيك صرنا أمام الطريق النازل لبيت المرحوم ، ومن حسن حظنا كانت الجوقة طالعة من البيت شي خمس ست طعش واحد
استبقناهم وسألناهم
- شو القصة .... شو في يا شباب
- أوف .. أوف ما بتعرفوا شو في وين عايشين
- والله ما منعرف شو في قاعدين من طي**** الضو عم نغب متة 
- خليكون بغب المتة أحسن ( عم يسخروا منّا الشباب ) 
- طلع الولي ( في ولي " مزار " ) 
- ولك ياعمّي  الناس رح توصل كندا وأنتو بعدكون هون
- وليش وكيف وصلوا كندا
- السفارة الكندية عم تطلب شباب للهجرة لكندا وصار ضرب كف بالهجرة والجوازات
  طلعنا ببعض أنا وصديقي المتخلف متلي اللي ما بيعرف هيك خبر ومتلهي بجامعتو متلي وبشرب المتة في أوقات الفراغ  وسأني
- شو رأيك بهالقصة معقول
- طبعا معقول طلّع  بهالمساطر 
- شايف شايف  بس شو بدها كندا تعمل بهيك مساطر
- ثيران تشباية منشان يحسنوا النسل
واتجه الصديق باتجاه ثيران التشباية وسألون :
أي ومين بدو يروح على كندا ، وكأنك عم تسمع فرقة أوركسترا ، وكلون سوا : نحنا
طلع فيّي مبتسماً مىْ شدقيه وناطر منّي الجواب وأنا طلّعت بالشباب اللي كان مافي بيناتون ولا وحد تجاوز الصف التاسع ومعظمهم من جيلنا وما حدا عندو شغل وقلت
- يالله  ... اتكلوا والله معكون يا شباب وموفقين . طلعوا فينا بسخرية وسألنا واحد 
- ليشر أنتو مو مفكرين تروحوا على كندا . قلتلو 
يا أخي طالما أنتو رح تروحو على كندا رح تصير كندا متل هون وهون متل كندا بالتوفيق يا شباب ولا تنسوا حدا هون